Botimi ekskluziv PRISHTINA është një vështrim unik i jetës së dikurshme prishtinase, qytetit të zejeve, rrugicave piktoreske, të shtruara me kalldrëm, shtëpive me karakter sofistikues, familjeve të njohura prishtinase, zonjave me stil elegant dhe intelektualëve të parë të kryeqytetit. Trashëgimia e përgjithshme, bërthama e qytetit historik, monumentet kulturore, janë rrënjët e identifikimit. Andaj, historitë individuale të prishtinasve, të rrëfyera në këtë vepër, për qytetin e viteve të hershme të shekullit XX, bëjnë të kuptojmë se sa shumë ka ndryshuar qyteti ynë, ku shumë objekte janë rrënuar në mënyrë të panevojshme, zona të tëra nuk janë konservuar, as nuk janë restauruar me kujdes. Ky libër në fokus të veçantë ka trashëgiminë arkitekturore, si një element i identitetit kulturor dhe një mjet për komunikim me të kaluarën. Të përditshmet e jetës së dikurshme prishtinase, përjetësohen në këtë vepër të veçantë, tejet mbresëlënëse të autores prishtinase Sanije Gashi.