Ti je ketu: Ballina > Aktuale > Kënaqësitë e jetës
Kënaqësitë e jetës
Kujtimet më të mira nga udhëtimet e mia, i kam nga Parisi! Kulla e Ajfelit, Harku i Triumfit, Luvri, Monmartri, Fusha e Elisesë, Versaja, Kisha Notre-Dame si dhe urat mbi lumin Sena, ky është Parisi i magjishëm, qyteti më i bukur dhe më romantik i Evropës. Ndaj, shkrimet për të shpesh nisin me shprehjen emocionuese – Pari’, mon amour…

Sanije Gashi


Qyteti në lumin Sena në çdo stinë është si në ëndërr, veçse më 21 qershor, në Ditën e muzikës, orkestrat dhe bendet luajnë në çdo shesh të Parisit. Shëtitjet romantike dhe muzika për të dashuruarit, shopingu dhe revytë e modës, të gjitha janë thuaja në një vend. Sapo të shkëlqejnë rrezet e diellit, parisienet i tregojnë gjithë botës pse e meritojnë që për kaq dekada të mbajnë epitetin e grave të cilat gjithnjë kanë pamje shik. Parisi është qytet i modës, ndërsa moda është një lloj i artit.

Bukuritë e qytetit
Shëtitja rrugëve, punktet romantike dhe kuriozitetet e njohura botërisht, bukuritë e qytetit, gjëra të denja për t’i parë, e bëjnë Parisin një nga destinimet më atraktive, pa marrë parasysh stinën e vitit në të cilën haset njeriu në këtë qytet romantik, banorët e të cilit çdo ditë, vërtet, i kënaqen jetës.
Parisi, qytet i modës, i revolucionit, i historisë dhe i kulturës… Vetë përmendja e emrit të tij, në gjithë botën askënd nuk e lë indiferent. Ata që kanë banuar në këtë qytet, i lidhin kujtime të paharruara me çastet e bukura të kaluara në shëtitjet romantike përgjatë Senës, në bulevardet e gjera dhe në Fushat e Elisesë, avenyja më e njohur në Paris…
Metropoli dymilionësh me shekuj është një nga qendrat më të rëndësishme të kulturave botërore, e qytetërimeve dhe qendrave edukative-arsimore. Ky qytet është me sharm të veçantë, frymëzim i shkrimtarëve dhe artistëve, ndërsa vizitorët nga bota e ndiejnë këtë për pak qëndrim në të.

Qytet si në pëllëmbë të dorës
Parisi shtrihet që nga pjesa e vjetër në njëzet kuarte, përderisa lumi Sena, thuaja për midis, e ndanë në të djathtë dhe në të majtë. Që herët ishte qendër e fuqishme tregtare dhe zanatlinjsh. Në themelet e vjetra të qytetit mbinë shumëkatëshet dhe ndërtesat elegante. Porse, për begatinë e Parisit të shekullit të mesëm sot bindshëm dëshmon katedralja gotike Notre Dame de Paris. Katedralen e shkëlqyer e zbukurojnë kulla në formë katrore, ndërsa i tërë objekti është i rrethuar me parkun e kultivuar. Brendinë e kishës së vjetër e zbukurojnë rozetat laramane dhe statujat e vlefshme nga shekulli i 13-të. Edhe pse këto bukuri të qytetit janë të popullarizuara falë përshkrimeve nga roman i Viktor Hygos dhe pamjeve nga filmi “Kambanari i kishës Notre Dame”, shenja mbrojtëse e Parisit është kulla më moderne e Eifelit. Ndërtimi i çuditshëm metalik është bërë më 1889 dhe që nga atëherë është atraksioni më i njohur turistik. Është e lartë 320 metra dhe e ndarë në tri platforma. Turistët, me ashensor arrijnë në majë të kullës. Është përjetim i çuditshëm, sepse nga ajo majë, qyteti duket si në shuplakë të dorës. Prandaj dhe derisa fluturojmë me aeroplan një natë të kthjellët mbi Paris, bashkudhëtari pranë më thotë: Ngrihu, ngrihu ta shohësh Parisin, rrallë mund ta përjetosh këtë bukuri!

Montmartre, vend i shkrimtarëve dhe piktorëve
Avenyja e gjerë e Fushës së Elisesë dhe e ndritur nga rrezet e diellit, është simbol i stilit të - gëzimit të jetës, me të cilin në shekullin e 19-të kanë jetuar parisienët. Është e gjatë dy kilometra dhe lidh sheshin de la Concorde me Harkun e Triumfit. Në katet e bukura janë të hapur restorantet prestigjioze dhe kafeteritë, zyrat elegante, kinosallat, tregtoret e shtrenjta dhe butikët, ku kthejnë parisienët e pasur dhe të famshëm. Parisi që nga moti është mekë artistike, kështu që në disa kuarte kanë jetuar bohemët. Në mesin e shekullit të 19-të, Montmartre ka qenë vendtubimi më i njohur i shkrimtarëve dhe piktorëve, përderisa elita intelektuale e shekullit të 20-të më me dëshirë janë shoqëruar nëpër kafeteritë e lira dhe në klubet e kuartit Latin.

Muzeu me 30 mijë piktura
Dashamirëve të artit edhe vizitat shumëditëshe bërë Luvrit (Louvre), muzeut më të madh në botë, nuk u mjaftojnë që të kenë një shpërfaqje sipërfaqësore për koleksionet e fotografive të mbledhura kujdesshëm, të skulpturave dhe të arteve të tjera. Veprat e vlefshme të bëra në kohën e Asirëve, Etrusëve, Grekëve dhe nga shekulli i mesëm, kanë qenë ekspoziturat e para në sallat e pallatit të dikurshëm mbretëror. Mes veprave me vlerë të pallogaritshme, vështirë është të zgjidhen më të bukurat. Mirëpo, shumica e vizitorëve të Luvrit do të zgjidhnin Mona Lizën e njohur…

Derisa ecën përgjatë brigjeve të lumit Sena, sikur të shoqërojnë shansonat e së njohurës Edit Piaf (këngët lirike me muzikë të lehtë), të cilat ‘ledhatueshëm’, lehtë-lehtë, të kthejnë prapa, jo vetëm në kohën kur jetoi shansonierja e njohur, me shansonat e së cilës jetonte i tërë Parisi... Mirej Matje, po kështu e njohur me zërin e saj magjik, Adamo… po kaq të freskojnë kujtimet për qytetin më të njohur dhe për zonjat shik, që i takojnë shoqërisë mondane parisiene…
Në Paris, sa herë të shkojë njeriu, do të gjejë diçka të bukur, të vlefshme, me të cilat pastaj do të të mbajnë kujtimet e këndshme, që nuk harrohen lehtë...

© REVISTA TEUTA. Të gjitha të drejtat janë të rezervuara.

 

 

#RevistaTEUTA

 

Ju gjithashtu mund të jeni të interesuar në..

 

 

Revista TEUTA
273

Revistë Moderne për Gruan Dhe Familjen
"Revista TEUTA"
Prishtinë, Kosovë

 

 

Të gjitha të drejtat e portalit www. revistateuta.com janë të rezervuara.
Asnjë material, nuk mund të shfrytëzohet, kopjohet, riprodhohet, publikohet në asnjë mënyrë nga ndonjë portal apo ndonjë medium tjeter pa leje të shkruar nga TEUTA.
Të gjithë shkelësit e këtyre të drejtave do të ballafaqohen me ligjin. COPYRIGHT 2017 TEUTA
Kontakt: info@revistateuta.com ww.revistateuta.com
Prishtinë, Kosovë
 

Mobile Version | Desktop Version