25 vjet të revistës

Kjo është Ditëlindja e 25-të e Revistës. Ky edicion, pra, është festim i një ikone, një shoqeje të besuar të gruas dhe të familjes. Për kaq vjet revista u ndodh pranë lexuesve të saj të sinqertë, pranë familjeve në periudha të ndryshme, në momentet më domethënëse të historisë sonë.

Sanije Gashi

Në botën e medieve periodike, revista shqiptare TEUTA ishte një avokate e të drejtave të grave, e cila u ndodh pranë familjeve, edukoi, ngriti e vetëdijesoi gratë, si një libër i mirë. Gjatë këtyre 25 vjetëve, revista u rrit dhe u shndërrua në një ikonë, me lidhje të veçantë emocionale mes brezave e familjeve jo vetëm kosovare. Ky edicion special, prandaj, feston rrugën e kaluar prej kaq vitesh, të cilën e lamë pas, duke mos e humbur pamjen e sotme, për të mëtuar edhe të ardhmen.
Edicioni i parë i revistës TEUTA është publikuar në maj të vitit 1994, në 36 faqe dhe në teknikën bardhezi. Sot, ndërkaq, del në dyfishin e faqeve dhe në kolor, me faqosje lakmuese! Revista shpejt u shndërrua në një hit dhe u bë e njohur ndër lexues.
Kosova në ato vite okupimi (kur filloi së botuari revista), ka përjetuar kohë të vështira, kur një përqindje e popullatës ishte e papunë, kështu që, duke rendur pas ekzistencës, shumë të rinj e familje shqiptare morën botën në sy.
Me rastin e nisjes së botimit të revistës në Prishtinë, presidenti Rugova e priti stafin e redaksisë, në shenjë përkrahjeje të punës së filluar. - ‘Mediet, u shpreh me atë rast, janë tepër të rëndësishme, krijojnë opinionin, ngrenë vetëdijen, edukojnë. Ju uroj, prandaj, punë të mbarë!
Veçse kini kujdes, se punoni në rrethana jo të zakonshme’, - ishte porosia e tij.
Pavarësisht nga kjo e kaluar, revista ka shkëlqyer si yll në errësirë nate. Ishte shumë pozitive dhe i solli familjes, lexuesve, një optimizëm. Kur lufta më 1999 mbaroi, dhe njerëzit u gjendën të dërrmuar, revista u doli krah me numra specialë, me qëllim rehabilitimi shpirtëror të familjes, të kthimit të fëmijëve të traumatizuar në jetë normale…, por edhe me suplemente, duke mundësuar një rehati familjare. Fundi i luftës ishte fillimi i epokës së re për gratë. Gjatë edicioneve ndër vite, revista shënoi vlerësime nga personalitete të shquara. Që me daljen e numrit të parë, njëra nga intelektualet me kulturë, Nermin Vlora, do të shkruante: “Kur për herë të parë botohet një revistë për gruan shqiptare, ajo paraqet një ngjarje me rëndësi të madhe. Kjo dëshmon jo vetëm emancipimin e gruas, e cila, pas zaptimit të Ilirisë nga Romakët e deri në ditët tona, ishte e shtypur dhe e robëruar’.
Në vitin 2019, gruaja shqiptare është shumë më ndryshe nga ajo e viteve të hershme. Gjatë zhvillimit, evoluimit, edhe përmbajtja e revistës gjithashtu ka ndryshuar. Ne gjithnjë mëtojmë të dimë, të mësojmë për çështjet që prekin jetën e gruas, jetën në familjet tona.
Edukimi, ngritja, emancipimi, vetëdijesimi i gruas janë barometri më i mirë për matjen e zhvillimit, përparimit dhe begatimit të një shoqërie.
Do të dëshiroja të theksoja se puna për revistën TEUTA ka qenë, vërtet, një privilegj. Është nderim i veçantë, por që asnjëherë nuk ka qenë lehtë. Për 25 vjet kam pasur kënaqësinë të punoj me staf të talentuar, pasionant dhe profesionist, të përkushtuar, të cilët kanë ndihmuar në realizimin e temave për ta pozicionuar revistën jo vetëm në stendat e revistave, por edhe në zemrat dhe mendjet e të gjithë shqiptarëve. Veç anëtarëve të brendshëm të redaksisë, një kontribut të mahnitshëm dhanë edhe korrespondentët e rregullt nga shtetet e ndryshme, të cilët me shkrimet e tyre, për kaq vite pasuruan përmbajtjen e revistës. Është e njerëzishme që me këtë rast të theksohet Redaksia fillestare, që sajohej nga bashkëpunëtorët e hershëm: Burbuqe Rushiti, Ibrahim Kadriu, Sakibe Qena, Nerimane Kamberi, Sulejman Dërmaku, Besim Rexhaj, Blerina Gashi si dhe nga korrespondentët nga gjithë bota, që ishte diçka jo e zakontë jo vetëm ndër ne: Kozeta Mamaqi (Tiranë), Nermin Vlora (Romë), Adelina Balashi (Athinë), Luz Thaqi (Nju-Jork), Gani Bytyçi (Gjenevë), Zyrifa Kqiku e Valbona Luta (Londër), Antigona Qena (Oslo),
Qibrie Hoxha (Stokholm), Avni Çitaku (Ankara), Ibrahim Berjashi (Ulqin), të cilët i falënderoj çiltërisht nga zemra.
Ndërsa redaksinë e tashme me punën e tyre e nderojnë profesionistët: Albana Beqiri, Faik Hoti, Fadil Berisha, Ibrahim Kadriu, Antigona Uka, Blerina Gashi, Afërdita Uka, Sulejman Dërmaku, Ridvan Slivova, Blinera Gashi.
Dhe, më e rëndësishmja, i falënderoj lexuesit e rregullt, besnikë, të TEUTËS për përkrahjen, miqësinë dhe shoqërimin gjatë këtyre 25 vjetëve të botimit të revistës. Ngaqë, ata janë arsyeja e ekzistimit tonë!

© REVISTA TEUTA. Të gjitha të drejtat janë të rezervuara.